Na Shomari Binda
Serengeti,
WANANCHI wa
wilaya ya Serengeti mkoani Mara wamedai kuwa kutosomwa kwa taarifa za mapato na
matumizi ya michango yao katika mfuko wa afya ya jamii CHF ni moja ya sababu
kubwa ambayo imewakatisha tamaa kuendelea kuchangia mfuko huo.
Walisema
pamoja na mfuko huo kuonyesha manufaa makubwa
baada ya kuanzishwa kwake mwaka 2004 kwa kuboresha huduma za afya hasa katika upatikanaji wa dawa maeneo
ya vijijini lakini kitendo cha Serikali za vijiji na kamati za afya za vijiji
kushindwa kutoa taarifa hizo kumewakatisha tamaa wananchi wengi kujiunga na
mfuko huo huku wale walikuwa wanachama wakishindwa kuendelea kiachangiaji.
Katika maoni
yao ambayo wameyatoa kwa nyakati wakiti wakizungumza na waandishi wa habari
ambao wako katika wilaya hiyo na wilaya Rorya kufanya utafiti wa huduma za afya
zinazotolewa kupitia CHF na mfuko wa taifa wa bima ya afya,wananchi walisema
pomoja na kuhitajika elimu zaidi lakini tatizo la kukosekana kwa uwazi kwa
fedha za mfuko huo ni moja ya changamoto kubwa zinazoukabili mfuko huo.
“Huu mfuko
wa afya ya jamii wakati unaanzishwa kwa kweli tuliona ni mkombozi mkubwa kwetu
kwani tulipoambiwa tunachangia elfu tano mwaka mzima na tunapata matibabu watu
sita hadi nane wakiwemo baba na mama wananchi wengi tulijiunga lakini sasa
wengi tumekata tamaa kwa vile hatupati dawa pia hatusomewi taarifa za michango
yetu”alisema Mzee Jackson Mteba mkazi wa kijiji cha Bwitengi.
Naye Joyce
Manchati mkazi wa kijiji cha Robanda,alisema kuwa sababu nyingine kubwa ambayo
pia imesababisha wananchi wengi kushindwa kuendelea kuchagia mfuko ni ukosefu
wa dawa katika Zahanati na vituo vya afya katika maeneo ya vijijini.
“Unakuta
umechangia elfu tano ili familia iweze kupata matibabu mwaka mzima lakini
ukifika tu katika kituo unaambiwa hakuna dawa tunalazimika kwenda hospitali ya
wilaya kule Nyerere DDH au kwenda kununua dawa katika maduka binafsi sasa
yanini nitoe elfu tano zangu bila kuona faida”alisema Joyce.
Kauli hiyo
ya Joyece imeongwa mkono na mkazi mwingine wa kijiji cha NataMbiso William
Mahela ambaye amedai kuwa tangu familia yake ichangie kiasi hicho cha fedha
katika mfuko huo kwa miaka mitatu mfululizo hakuna hata siku moja iliwahi
kupata huduma katika kituo cha afya katika eneo hilo kwa kukosa dawa hatua
ambayo imemfanya kujiondoa kuwa mwanachama wa mfuko huo.
“Kila
tukienda pale kituoni hata kama ni ugonjwa wa Malaria unaambiwa hakuna dawa na
kutakiwa ukanunue katika maduka ya dawa sasa iweje niendelee kuwa mchangiaji
bila ya kuona manufaa lakini pia hakuna hata siku tuliwahi kupewa taarifa za
mapato na matumizi ya michango yetu”alisema Mahela.
Hata hivyo
idadi kubwa ya wananchi wa wilaya ya Serengeti ambao walihojiwa kuhusu huduma
za CHF walishauri Serikali kupitia halmashauri kusimamia uwazi wa michango ya wananchi na upatikanaji wa dawa katika
vituo vya afya vya kutolea huduma hatua ambayo walisema itawezesha wananchi
wengi kuvutiwa kujiunga na mifuko hiyo.
Kwa upande
wake mganga mkuu wa wilaya Serengeti Dk Salum Manyata,alisema mfuko wa CHF
umekuwa ikikabiliwa na changamoto nyingi ikiwemo elimu ndogo kwa wananchi na
kutokuwepo kwa utashi wa kisiasa katika kuhamasisha wananchi kujiunga na mfuko
huo.
Taarifa ya
mganga huyo wa wilaya ya Serengeti ambayo ilisomwa na kaimu mratibu wa mfuko Dk
Shadraka Isaro mbele ya waandishi wa habari wanaofanya utafiti huo,alisema
changamoto hizo zimesababisha wanachama wa mfuko huo kupungua kutoka 5,210 waliokuwepo
mwaka 2004 wakati mfuko huo ukianzishwa hadi kufikia 485 mwezi Mei mwaka 2012.
“Wakati wa
utekelezaji wa mfuko huu wa afya ya jamii,changamoto nyingi zimejitokeza hivyo kufanya
idadi ya wanachama wake kushuka toka 5,210 mwaka 2004 hadi kufikia 485 mwezi
mei mwaka 2012 lakini pia tatizo la uelewa mdogo wa jamii juu ya mfuko huu na
dhana ya ushirikishwaji,umiliki na usimamizi wa huduma za afya ni miongini mwa
changamoto tulizozibaini”alisema mganga huyo mkuu wa Serengeti.
Hata hivyo
kaimu mkurugenzi wa halmashauri ya Serengeti Salvanus Lugira,amekiri mfuko wa CHF
kukabiliwa na changamoto nyingi huku akisema tayari halmashauri imetoa waraka
wa kuzitaka serikali za vijiji kutoa mapato na matumizi katika vijiji vyao
ikiwemo michango hiyo ya wananchi kuhusu mfuko huo huku viongozi wa kisiasa
wakitakiwa kufanya uhamasishaji mkubwa kwa wananchi katika kujiunga na CHF.
Post a Comment
0 comments