WAKULIMA wa zao la pamba mkoa Mara wamewalalamikia wataalamu
wa zao hilo kwa kushindwa kusimamia majukumu yao na kupelekea mkulima kuendelea
kuwa masikini huku watu wachache wenye viwanda wakiendelea kutajirika kwa
kutumia nguvu zao.
Wamedai takwimu zinazofanywa na wataalamu kuhusu zao hilo na
usimamizi wa ununuzi sio sahihi hivyo kufanya fedha nyingi za wakulima
wanazostahili kuzipata kutowafikia baadwa ya uzalishaji wa zao la pamba
unaotokana na nguvu zao.
Hayo yalisemwa kwenye kikao cha pili cha wadau wa sekta
ndogo ya pamba kilichofanyika kwenye ukumbi wa uwekezaji wa mkoa wa Mara
kilivhowashilikisha wakulima wa zao hilo,wakuu wa Wilaya,wataalamu na wadau mbalimbali wa zao hilo.
Mmoja wa wakulima hao kutoka Wilayani Serengeti Renald
Reuben alisema wataalamu wanapaswa kuwa karibu na wakulima katika msimu wa
pamba kuanzia maandalizi,upandaji hadi kwenye msimu wa mavuno ili kuweza
kudhibiti ubadhilifu wakati wa utolewaji wa pembejeo na uununuzi wa pamba.
Alisema moja ya sehemu ambayo wakulima wanapata adha kubwa
na kunyonywa ni kwenye mizani inayotumika wakati wa ununuzi wa pamba kupitia
kwa mawakala ambao wamekuwa wakifanya wizi kwa kuvuruga mizani hivyo kupelekea
mapato mengi ya wakulima kupotea huku mkulima akiendelea kuwa masikini.
Reuben alisema licha ya Serikali kutilia mkazo kilimo cha
pamba bado kuna changamoto nyingi zinazowakabili wakulima wa zao hilo na kudai
bila kutatuliwa kwa dhati wataendelea kuwa watu duni huku wachache wakinufaika.
Akizungumza katika kikao hicho,Kaimu Mkurugenzi wa Bodi ya
Pmaba Tanzania Gabriel Mwala alisema ili kuhakikisha wakulima wa zao la pamba
wananufaika na kilimo hicho,bodi itahakikisha inatoa leseni kwa wanunuzi
wanaomjali mkulima kwa kufanya uwekezaji kwa ajili ya kilimo kwa mfumo wa
kilimo cha mkataba ili kumuondolea adha mkulima.
Alisema kampuni ya ununuzi na uchambuzi wa pamba itakayopewa
leseni ni ile itakayotoa fedha kwanza ajili ya maandalizi ya kilimo cha pamba
na kuthibitishwa na wakuu wa Wilaya kwa kampuni hiyo kushiriki katika shughuli
za maendeleo katika Wilaya ambayo wamepanga kwenda kununua pamba wakati wa
msimu ili kumpa unafuu mkulima.
Akifunga kikao hicho kwa niaba ya Mwenyekiti wa kikao Mkuu
wa mkoa wa Mara John Tupa,Mkuu wa Wilaya ya Butiama Angelina Mabula alisema
pamoja na mambo mengine ili kumuinua mkulima wa zao la pamba lazima mfumo wa
ununuzi wa pamba ufanywe na vikundi vya wakulima wenyewe ili kuepukana na
mawakala wasio waaminifu na wadanganyifu katika mizani na kkupitisha azimio la
kusajiliwa kwa vikundi hivyo kabla ya msimu mpya.
Mabula alisema ni muhimu bodi ya pamba kuhakikisha mfumo
mpya wa kuandaa mikataba ya wakulima na wanunuzi inawashirikisha wanasheria na
kuwataka wakulima kufuata kanuni bora za kilimo ili kuwa ni tija na kuzingatia
mbegu bora zinazohitajika
Post a Comment
0 comments